ИСТОРИЯ

Здруженє за помоц ментално нєдостаточно розвитим особом Општини Кула основане 1996. року
як здруженє гражданох хторе збера родичох, дзеци и фаховцох хтори робя зоз дзецми хтори маю
почежкосци у розвою. Перши предсидатель здруженя бул Мирослав Симин, родитель дзецка зоз
интелектуалнима почежкосцами, а секретар Душан Кулїч , дефектолог-олиґофренолоґ.

По 2001. рок активносци дружтва реализовани з часу на час и подрозумйовали насампредз
друженя родичох. Початком 2001. интернационална фондация «Save the children» потримала
проєкт “Библиотека бавискох” зоз хторим почало каждодньове зберанє членох. У наиходзацим
периодзе реализовани даскельо менши проєкти хтори обезпечели предлуженє и злєпшанє
Библиотеки бавискох.
Мисия здруженя то: Робота на социялизациї, здравственей и социялней защити МНРО, роботним
оспособйованю и воспитаню и обезпечованю психо-социялней потримовки родичом и
потримовки у витворйованю законских правох.
Здруженє часц мрежи орґанизацийох за помоц МНРО при Союзу за помоц МНРО Войводини и
Сербиї, алє самостойно роби на териториї Општини Кула у седем населєних местох хтори маю
49.000 жительох.
Найвекши розвой «Белава птица» як орґанизация, а и єй члени витворели у периодзе после 2006.
року. Насампредз дзекуюци факту же виєдначени права родичох, фаховцох и волонтерох у
приношеню одлукох о напрямох роботи орґанизациї. Теди по першираз Здруженє поднєсло
инициятиву локалней самоуправи же би самостойно орґанизовало услуги за особи зоз
почежкосцами у розвою.

У тим периодзе отворени Дньови центер за членох Дружтва, реализовани три проєкти у обласци
роботней терапиї, орґанизовани превоз прилагодзени особом зоз инвалидитетом, адаптовани и
преширени простор Здруженя и анґажовани нови члени.
Под час 2011. року дезкуюци домашнїм и страним донатором и гражданом хтори потримали
роботу Здруженя, збудовани обєкт у хторим ше реализує услуги змесценя хасновательох
тирвацого або дочасового характеру.
Под час роботи Здруженя значни труд уложени до промовованя активносцох Здруженя и правох
особох зоз инвалидитетом як и и на розвою контактох зоз гражданами и зоз локалну самоуправу.
Дружтво 2007. року достава назву: Здруженє за помоц МНРО „Белава птица“ Кула, и нєшка у
своїм составе ма шейсц услуги социялней защити и розлични активносци потримовки фамелийом,
дзецом и одроснутим особом зоз почежкосцами у розвою.